Kaveinga: ‘Okatopa ki Tisema 2023
‘Okatopa: Ko hotau Ui, ke tau mo’ui Faka-Tisaipale ke fe`unga mo e fononga pilikimi `oku tau fai mei taimi ki `Itāniti / We are called to as authentic disciples, pilgrims journeying from time to eternity.
Sāpate 1: Ke tau hūfia ‘a e ngāue ‘o e ‘ahó ni mo e uiké, pea tau kau fakataha mo e ngaahi Siasi faka-Kalisitiane `i māmani `i hono fakamanatu ‘a e Sāpate ‘o e Komiunioni Toputapú pea tau tukupā ke hoko atu ‘etau “mo’ui Faka-Tisaipalé ke fe`unga mo e fononga pilikimi `oku tau fai mei taimi ki `itānití” (Filipai 2: 1-11)
‘Ahongofua 1: Ke tau kole fakamāatoato ki he ‘Otua na’á ne fai hotau Ui ke “mo’ui Faka-Tisaipale ke fe’unga mo e fononga pilikimi ‘oku tau faí”, ke tokoni’i kitautolu ke tau lava tokoni’i ha ni’ihi ke hoko ko e ngaahi maka tuliki ‘i he’etau ngāue he Siasí (Matiu 21: 42-44).
Sāpate 2: Ke tau hūfia ‘a e ngāue ‘o e ‘ahó ni mo e uiké, pea tau tali ‘a hotau Ui ke “tau mo’ui Faka-Tisaipale” ‘i he’etau ‘ilo ‘oku fe’unga ‘ānoa pe ‘a Sihova ma’a ‘etau ngaahi me’á, pea ko e tauhi ki aí, ko hono tauhi ia ‘o e Sāpaté ke mā’oni’oní (‘Ekisoto 20: 7-9).
‘Ahongofua 2: Ke tau hūfia ‘etau fānau talavou mo finemuí ke nau tali honau Ui “ke mo’ui Faka-Tisaipale ke fe’unga mo e fononga pilikimi ‘oku faí” ‘i ha kuonga kuo lahi fau ai ‘a e ngaahi ‘otua ‘aitolí ke kaiha’asi ‘enau tuí mo e falalá mei he ‘Otua mo’uí (‘Ekisoto 32: 11-14).
Sāpate 3: Ke tau hūfia ‘a e ngāue ‘o e ‘ahó ni mo e uiké, pea tau tali mo e loto hangamālie ko hotau Ui “ke mo’ui Faka-Tisaipale ke fe’unga mo ‘etau fononga pilikimi ‘oku faí,” ko e Ui ke tui hotau “teunga Kātoangá” - ko e tui, falala mo e talangofua kakato ki he ‘Eiki ‘o e Kātoangá (Matiu 22: 11-14).
‘Ahongofua 3: Ke tau tautapa ki he ‘Otua na’á ne Ui kitautolu ke “mo’ui Faka-Tisaipale ke fe’unga mo e fononga pilikimi ‘oku tau faí” ke ne tokoni ki he ngāue fakamelino ‘oku fai ki he vā ‘o Lūsia mo Ukraine (Saame 99: 6-9).
Sāpate 4: Ke tau hūfia ‘a e ngāue ‘o e ‘ahó ni mo e uiké, pea tau tukupā ke fai ‘a e me’a kotoa pe te tau ala lavá ke fakamo’oni ko e “polo’i kitautolu ‘o ‘Atonai,” pea ‘oku ‘otautolu ia pea ‘o’ona kitautolu (Matiu 22: 21).
‘Ahongofua 4: Ke tau lotu ma’anautolu kotoa pē ‘a e kau kole hūfanga (refugees) koe’uhi ko e ngaahi faingata’a ‘oku nau mo’ua ai ‘i honau fonuá kae’uma’ā kinautolu kuo ma’ungatamaki ‘i he tau ‘i Lūsia mo Ukraine ke hoko ‘a Sihova ko honau “Nofo’anga” he lotolotonga ‘o e faingata’a ‘oku nau fekuki mo iá (Saame 90: 1-6).
Sāpate 5: Ke tau hūfia ‘a e ngāue ‘o e ‘ahó ni mo e uiké, pea tau vēkeveke ke tali hotau Ui ke “mo’ui Faka-Tisaipale ke fe’unga mo e fononga pilikimi ‘oku tau faí” ‘aki ‘etau ‘ofa ki he kakai kotoa pē ‘o hangē ko hono ‘ofa’i kitautolu ‘e he ‘Otuá (Matiu 22: 36-40).
Novema: Ke tau tutui ki mu’a ‘i he’etau Ngāué mo e Loto Hounga’ia /
Let us press forward with actions grounded in gratitude.
‘Ahongofua 1: Ke tau fakafeta`i `i he`etau tu`uta ki he mahina fo`oú ni, pea tau lotu ke pehē ai pe `etau “tutui ki mu`a `i he`etau ngāué” `o kei tukupā ke fākafua `a e ngaahi kavenga mafasia `o e mo`uí `i he `ilo`ilo pau `oku kau `a Sihova mo kitautolu (Siosiua 3: 14-17).
Sāpate 1: (All Saints Sunday) Ke tau hūfia ‘a e ngāue ‘o e ‘ahó ni mo e uiké, pea tau fakamālō ki he `Otuá `i he mo`ui `a e kau holomu’a kuo nau hiki atu `o hoko ko e kau ‘Fakafe’ao Tokolahi’ ka ‘oku nau ‘aofia ‘etau fonongá ke fakamanatu mai ‘a e mahu’inga ‘o ‘etau fakamo’oni ma’á e Pule’anga ‘o e ‘Otuá lolotonga ‘i he‘etau mo’uí (Saame 34: 1-10, 22).
‘Ahongofua 2: Ke tau lotua `a e fononga `oku fai e hotau ngaahi fāmilí `o fakapapau`i `oku tau kei fili pe ke tauhi kia Sihova pea fai ‘aki hotau kotoá ‘i he “tutui ki mu`a `i he`etau Ngāué mo e Loto Hounga`ia” (Siosiua 24: 14-25).
Sāpate 2: Ke tau hūfia ‘a e ngāue ‘o e ‘ahó ni mo e uiké, pea tau hapai ‘i he lotu si’i kau toulekeleká ke kei tupulaki `enau mo`uí `o nau kei “tutui ki mu`a” `i hono fakahoko honau fatongia ki he fānaú mo e ngaahi makapuná (Saame 78: 1-7).
‘Ahongofua 3: Ke fai hotau tukuingatá mo hotau lelei tahá `i he taimi kotoa pē `i hono fakahoko `a e ngaahi fatongia kotoa pe kuo ui kitautolu ki ai ‘o “tutui ki mu’a ‘i he’etau Ngāué mo e Loto Hounga’ia” (1 Tesalonaika 5: 1-11)
Sāpate 3: (Thanksgiving Sunday) Ke tau hūfia ‘a e ngāue ‘o e ‘ahó ni mo e uiké, pea tau kamata `a e uike Fakafeta`i `o e ta`u ko `eni `aki `a `etau fakapapau`i `oku tu`u ma`u `a `etau `amanakí `ia Sihova pea mo e loto hounga`ia (Saame 123).
‘Ahongofua 4: Ke tau “fakafeta‘i kia Sihova; he ‘oku lelei ia: He ‘oku tolonga ‘o ta‘engata ‘ene ‘alo‘ofá,” `o tatau `i he faingata`a mo e faingamālie pea `oku kei tu`u ma`u pe `a `ene tauhí, pea `oku tau lave ai `i he uike Fakafeta`i `o e ta`u ko `eni, pea mo e `aho kotoa pe `o `etau mo`uí (Teutalonoma 8: 7-18).
Sāpate 4: Ke tau hūfia ‘a e ngāue ‘o e ‘ahó ni mo e uiké, pea `oua `e tuku `a `etau Fakafeta’ia mo Fakamālō`ia `a hono Huafá `o fakasino ia `i he `etau “tutui ki mu’a ‘i he’etau Ngāué mo e Loto Hounga’ia” (Saame 100).
Tisema: Ke tau ‘apasia ki he Taha ‘okú ne liliu e me’a kotoa pē, pea tau tatali mo e Fakatu’amelie
/ Living in Awe of the One Who Changes Everything even as we wait in Hope.
‘Ahongofua 1: Ke tau hūfia `a e fānau ‘i hotau ngaahi lotofalé fakataha mo e fānau tupu `o e fonuá ni ke kei a`u mai `a e ivi fakamo`ui mo fakafo`ou `o e `Otuá `o fatu `enau mo`uí ke fe`unga mo taau mo e fononga`anga `o e kuonga faingata`a ko `eni (`Aisea 64: 1-9).
Sāpate 1: Ke tau hūfia ‘a e ngāue ‘o e ‘ahó ni mo e uiké, pea tau fakafeta`i `i he`etau a`usia `a e ‘Etivení, ko e Fa’ahita’u `o e “Tatali mo e Fakatu`amelie,” pea fakasino ia `i hono fakakakato `a hotau ngaahi fatongia `i he fāmilí, Siasí mo e fonuá (Saame 80: 17-19).
‘Ahongofua 2: Ke tau hufia `a e Setuatá mo hono Tokoní, mo e kau Ma`u Lakanga kotoa `i he Siasí ke nau kei ma`u ivi mo mālohi ke fakahoko honau ngaahi fatongia ‘i he faka`osinga `o e ta`ú `aki `a e loto `oku “`apasia ki he Taha `okú ne liliu `a e me`a kotoa pē” pea patoloaki ai `a e fakatu`amelie `a e `Otuá ke `inasi ai `a e taha kotoa pē (1 Pita 3: 14-15a).
Sāpate 2: Ke tau hūfia ‘a e ngāue ‘o e ‘ahó ni mo e uiké, pea tau “`apasia ki he Taha `okú ne liliu `a e me`a kotoa pē, `o tau hoko ko `ene me`angāue oku kau ki hono “Teuteu ‘i he toafá ‘a e hā‘ele‘anga ‘o Sihová” (Aisea 40: 1-5).
‘Ahongofua 3: `E ke tau `apaisa mu`a `o fakamā`oni`oni`i `etau mo`uí `aki `a `etau fakapapau`i `oku fakahoko hotau ngaahi fatongiá `aki `a e fai fakalaó mo e fai totonú (`Aisea 61: 8-11).
Sāpate 3: Ke tau hūfia ‘a e ngāue ‘o e ‘ahó ni mo e uiké, pea tau manatua mo hūfia `anautolu `oku lolotonga fakaakeake mei he faingata`a fakaeloto `o e māvae `i he fa’ahita’u `o e `Etivení, Kilisimasí mo e Faka`osita`ú, `i he tali ui mo’ui kuo fai `e honau `ofa`angá (Saame 126).
‘Ahongofua 4: Ke tau feinga ‘i he lotu mo e hūfia ke tau malava `o hoko ko e kau faka-melino; “`Ene ngāue lahi ko e faka`osi, Fetu`usi mo e tāufehi`a, Te ne `atu holo `etau ngaahi kovi, Ko e `Eiki-He-Melino ia” (Aisea 52: 7-10)
Sāpate 4: Ke tau hūfia ‘a e ngāue ‘o e ‘ahó ni mo e uiké, pea tau fakafeta’i ki he ‘Otua ‘o e faka-‘Amanakí ‘i he tāpuaki faka’itāniti ‘oku toloto monū’ia ai e ngaahi fa’ē ‘a e Siasí, pea tau lotua “Ho’omou vaha’angataé na, Mou tauhi pe ke ma’u, Na’a fili ha’amou taha Ke fa’ē ki ha hau” (Luke 1: 30-33).
‘Ahongofua 5: Ke tau kau fakataha pe ‘i hono hiva’i ‘a e Ta’anga ‘o e Fakafeta’i mo e Fakamālō he Taha’i Me’a’ofa Fungani kuo tau mātā ‘i he faka’osinga ‘o e ta’u ko eni ‘i he hokomai ‘a Kalaisi ko hotau ‘Amanaki’anga mo e Maama (Luke 2: 28-33).
Sāpate 5: Ke tau hūfia ‘a e ngāue ‘o e ‘ahó ni mo e uiké, pea ko ‘etau leá pe ia ko e Fakafeta’i mo e Fakamālō ki he ‘Otua Māfimafi he’ene toloi mo fe’unu hotau ngaahi ‘ahó ‘o tau lave monū ai he ‘aho faka’osi e ta’ú (Saame 148).
Contact Us for Help
View staff by program area to ask for additional assistance.