Kaveinga Lotu Sānuali – Siune 2026

Sanuali:  Ko e Kamata’angá:  Kumi Hakili kia Sihova ‘aki ‘a e Anga malū, Faka’aki’akimui pea mo e Tui Pīkitai  / “Beginnings:  Searching God with Peace, Humility and Unshaken Faith.”

‘Ahongofua 1:  Ke tau kamata ‘a e ta’u fo’oú ni ‘aki ‘etau “Kumi hakili kia Sihova ‘aki ‘a e Anga malū, Faka’aki’akimui pea mo e Tui Pīkitai” (‘Aisea 60: 1-6).

Sāpate ‘o e ‘Epifaní:  Ke tau hūfia ‘a e ngāue ‘o e ‘ahó ni mo e uiké pea tau hūfia ‘a e kau Taki ‘o e Siasí kuo tau fili ke nau tataki ‘etau ngāué ke nau kau fakataha pe mo e kau Makí ‘i he “Kumi hakili” ki he tamasi’i ‘Otuá pea mo ‘ene Maamá ke ne huluhulu e to’o fatongia he ta’u fo’oú ni (Matiu 2: 1-2).  

‘Ahongofua 2:  Ke tau hūfia ‘a e Pule Lautohí mo e kau Failautohi Faka-Sāpaté ke nau ma’u ivi mei he Laumalie Mā’oni’oni ke fua ‘aki e fatongia mamafa mo mahu’inga ‘oku nau pole ki ai ‘i he ta’u fo’oú ni (‘Aisea 42: 6-7).

Sāpate ‘o e Papitaisó:  Ke tau hūfia ‘a e ngāue ‘o e ‘ahó ni mo e uiké, pea tau faka’ilonga’i ‘a e kamata’anga ‘o e ta’u fo’oú ni fakataha pe mo hotau “Kamata’anga” ‘i he Lotu faka-Kalisitiané ‘aki ‘etau tukupā ke fai hotau lelei tahá ke fakamo’oni’i kuo ‘osi fai hotau papitaisó mo fakatāpui ko e muimui ‘o Kalaisi ‘o a’u ki he ngata’angá (Matiu 3: 16-17).

‘Ahongofua 3:  Ke tau hūfia ‘a e Pisopé mo ‘ene Kapinetí, Talēkita ‘o e ngaahi Potungāue kotoa pē ‘a e Konifelenisí, Kau Seá mo e Ngaahi Komití mo e Poaté ke fakaivia kinautolu ‘e he Laumālie Mā’oni’oní ke lava ‘aki e ngāue mahu’inga kuo ui kinautolu ki ai ‘i he ta’u fo’ou ‘oku tau kamatá ni (‘Aisea 49: 5-7).

Sāpate Hono 2 Hili e ‘Epifaní:  Ke tau hūfia ‘a e ngāue ‘o e ‘ahó ni mo e uiké, pea tau faka’ilonga’i e Sāpate ‘oku fakamahu’inga’i ai ‘a ‘etau felālāve’i ko e kaungā pilikimí (Human Relations Day), ‘aki ha’atau lotu ma’anautolu kotoa pe ‘a e kau “muli” ‘oku lolotonga faingata’a’ia ‘i ‘Ameliká ni koe’uhi ko e ngāue ‘a e ICE (Immigration and Customs Enforcement).  ‘Ofa pe ke fai tokonia mai mo poupoua e ngāue kotoa pe ‘oku fakahoko ke lava ‘aki honau fakatau’atāiná (Sione 1: 35-42).  

‘Ahongofua 4:  Ke tau feinga ‘i he kamata’anga ‘o e ta’u fo’oú ni, ke “Kumi Hakili” ki he ‘Eiki na’e Pekia mo Toetu’u ka tau mo’ui aí, ke tokoni’i ’etau nofo he fāmilí, Siasí mo e Fonuá ke tau lava ‘o taha ‘i he leá, ngāué, tuí mo e ‘ofá (1 Kolinito 1: 10 & 18).  

Sāpate Hono 3 Hili e ‘Epifaní:  Ke tau hūfia ‘a e ngāue ‘o e ‘ahó ni mo e uiké, pea hapai ‘etau fānaú ‘i he lotu ke fai mai honau fakamaamá ‘e he Maama Mo’oniá ke ‘oua na’a faifaiange kuo nau feto’oaki e “maamá” mo e “po’ulí” (‘Aisea 9: 2).

‘Ahongofua 5:  Ke tau hūfia kinautolu kotoa pē ‘oku lolotonga faingata’a’ia ‘i he Gaza Strip kae’uma’ā ‘a ‘Isileli pea mo kinautolu ‘i Ukraine mo e ngaahi fonua ‘oku lolotonga hoko ai ha tau mo ha lingi toto, ke fakavave mai ha tokoni mo ha fakamelino ke nau malu ai mei he ngaahi faingata’a kāfakafa ‘oku nau fehangahangai faka’aho mo iá (Maika 6: 8).

Fepueli:  Tataki ‘e he Maama ‘a e ‘Otuá:  Sivisivi’i mo Fakatonutonu ‘etau tauhi kiate Iá. / 
    “Guided by God’s Light: Serving God with Accountability and Alignment.”

Sāpate Hono 4 Hili e ‘Epifaní:  Ke tau hūfia ‘a e ngāue ‘o e ‘ahó ni mo e uiké, pea tau hūfia ke “Tataki ‘e he Maama ‘a e ‘Otuá” ‘a e ngaahi feinga fakamelino kotoa pe ‘oku fai ‘i hotau ngaahi lotofale faka-fāmilí, Siasí, Sosaietí mo e ngaahi Fonuá (Matiu 5: 9).

‘Ahongofua 1:  Ke tau tukupā ke “Sivisivi’i mo Fakatonutonu ‘etau tauhi kiate Iá,” ‘aki ‘etau fai e me’a kotoa pe te tau ala lavá ke tokoni’i ‘aki kinautolu kotoa si’i kau tukuhāusia; masiva; faingata’a’ia fakasosiale, ‘ekonomika mo fakaeloto etc. (‘Aisea 58: 6-7).

Sāpate Hono 5 Hili e ‘Epifani:  Ke tau hūfia ‘a e ngāue ‘o e ‘ahó ni mo e uiké, pea tau lotu ke “Tataki (kitautolu) ‘e he Maama ‘a e ‘Otuá” pea “Sivisivi’i mo Fakatonutonu ‘etau tauhi kiate Iá” ‘o tau hoko ai ko e fakahā’anga ‘o e “Maamá” ki he ‘ātakai ‘oku matu’aki mahu’inga fau ke fakaulo ai e maama ‘a e ‘Otuá (Matiu 5: 14-16).

‘Ahongofua 2:  Ke tau lotu ke “Tataki (kitautolu) ‘e he Maama ‘a e ‘Otuá” pea “Fakatonutonu ‘etau tauhi kiate Ia” ‘i hono fai pe me’a ‘oku tau taki taha lava ‘o faí, ‘i he ‘ilo pau, ‘oku tau ngāue kotoa pe ma’á e ‘Otua he Ngoue’anga ‘a e ‘Otuá (1 Kolinito 3: 6-9).

Sāpate Hā Fakakehe:  Ke tau hūfia ‘a e ngāue ‘o e ‘ahó ni mo e uiké, pea tau lotu ke “Tataki (kitautolu) ‘e he Maama ‘a e ‘Otuá” ke tau lava ‘o tali mo e loto fakafeta’i ‘a e Fekau ‘o e ‘ahó ni, “Ko hoku ‘Alo Pelé ‘ena, ‘a ia ‘oku ou hōifua aí” (Matiu 17: 5).

‘Ahongofua 3:  Ke tau kamata ‘a e Fa’ahita’u Lēnití ‘aki hano “Sivisivi’i mo Fakatonutonu ‘etau tauhi kiate Iá,” fakatomala fakamaatoato mo’oni pea tau kole ivi ki he ‘Otua Māfimafi ke ne tokoni’i ke tau hao mei he ‘ahi’ahí (Saame 32: 1-2).

‘Uluaki Sāpate he Lēnití:  Ke tau hūfia ‘a e ngāue ‘o e ‘ahó ni mo e uiké, pea tau lotu ke “Tataki (kitautolu) ‘e he Maama ‘a e ‘Otuá” ke tau ‘ilo ai ko e Folofola pe ‘a e ‘Otua ‘oku lava ke ikuna’i ‘aki ‘a e Filí mo ‘ene ‘ahi’ahí (Matiu 4: 10-11).

‘Ahongofua 4:  Ke tau lotu ke “Tataki (kitautolu) ‘e he Maama ‘a e ‘Otuá” ke tau lava ‘o fālō hotau “ki’i” māmani fakapukupuku mo si’isi’í ke fakakau ai e kakai kotoa pē, ‘i he fonua kotoa pē – ‘anautolu na’e ‘uhinga ai hono foaki mai ‘e he ‘Otuá hono ‘Alo-Tofu-Pe-Taha ne fakatupú ke hifo ‘o Pekia pea Toetu’u koe’uhi pe ko ‘ene ‘ofá (Sione 3: 16-17).  

Ma’asi:  Fononga ‘i he Tuí:  Falala, Fakalaulauloto mo Tali e Ui ‘a e ‘Otuá / 
    “Walking in Faith: Trusting, Discerning, and Obeying God’s Call.”

Sāpate hono 2 ‘i he Lēnití:  Ke tau hūfia ‘a e ngāue ‘o e ‘ahó ni mo e uiké, pea tau fakafeta`i `i he`etau a`usia `a e ‘uluaki Sāpate `o e mahiná, pea tau hūfia ke tau malava `o “Fononga ‘i he Tuí ‘aki ‘etau Falala, Fakalaulauloto mo Tali e Ui ‘a e ‘Otuá” (Saame 121).

‘Ahongofua 1:  Ke tau hūfia `anautolu kotoa pē `oku fekuki mo e fiekaia mo e fieinua fakamatelie ke nau matu`uaki `a e faingata`a `oku nau tofanga aí pea kei “Fononga `i he Tuí” `o tu`u ma`u `enau falalá `i he `Otua `oku kau mo kinautolú (Ekisoto 17: 1-7).

Sāpate hono 3 ‘i he Lēnití:  Ke tau hūfia ‘a e ngāue ‘o e ‘ahó ni mo e uiké, pea tau hūfia `a e ngaahi Tamai `a e Siasí mo e Potungāue `a e Kakai Tangatá `i he mahina `oku faka`ilonga`i ai `i he ngaahi Fai`anga lotu `a e Kuata `a e Kakai Tangatá, ke kei fakaivia kinautolu ke nau “Fononga `i he Tuí,” pea hoko `a e ngāue lahi `oku nau fakahoko `i he Siasí ko e fakamo`oni ki he ivi `o e  falala`Otuá (Loma 5: 1-5).

‘Ahongofua 2:  Ke tau hūfia `anautolu kotoa pē `oku nau fatongia `aki `a hono ako`i `etau fanaú `i he ngaahi `apiakó, Lautohi faka-Sāpaté, mala`e va`ingá, mo e ngaahi fatongia faiako kotoa pē ke fai tāpuekina kinautolu `e he `Otuá pea nau ma`u `a e poto fe`unga ke tauhi mo fakatupulekina e koloa `a e `Otuá kuo tuku falala kiate kinautolú (1 Sam 16: 7).

Sāpate 4 ‘i he Lēnití:  Ke tau hūfia ‘a e ngāue ‘o e ‘ahó ni mo e uiké, pea hapai hotau Siasí ke tau “Fononga `i he Tuí,” ‘o fou atu ta’eteteki ‘i he ngaahi tele`a `o e faingata`á `oku tau foua faka`aho he mo’uí ni (Saame 23).

‘Ahongofua 3:  Ke tau tautapa ki he ivi `o e Laualie Mā`oni`oní ke ne liliu `a e ngaahi holi `a e matelié `i he`etau ngaahi mo`uí, kae hoko ‘o mo`oni `a `etau “Fononga `i he Tuí” he kamata’anga ‘o e ta’u fo’oú ni” (Saame 130: 5-8).

Sāpate hono 5 ‘i he Lēnití:  Ke tau hūfia ‘a e ngāue ‘o e ‘ahó ni mo e uiké, pea tau fakapapau`i `i he Sāpate faka`osi `i he Lēnití `oku momoi `etau mo`uí ko e me`angāue `a e Laumālie Mā`oni`oni (Loma 8: 6-8).

‘Ahongofua 4:  Ke tau fakapapau`i `oku tau fakasino `a `etau tuí `aki `a `etau fakamasivesiva’i `etau mo`uí pea tau lava ai `o hoko ko e sevāniti tonunga `a Kalaisi (Filipai 2: 5-8).

Sāpate Paame:  Ke tau hūfia ‘a e ngāue ‘o e ‘ahó ni mo e uiké, pea tau fakamo’oni ki he’etau “Fononga ‘i he Tuí” ‘i he‘etau talitali lelei ‘a hotau Tu’í `okú ne hā’ele mai pea tau “Falala, Fakalaulauloto mo Tali e Ui ‘a e ‘Otuá” ke hoko ko hono kau muimui neongo ‘ene faingata’á (Saame 118: 19-29).

Kaveinga Lotu ki he Uike Tapú:

Mōnite:  Ke tau tukupā `i he kamata`anga `o e Uike Tapú ni, ke tau muimui kia Sīsū; ko e sevāniti ‘oku fakatōkilalo, manako ki he fai meesi mo e fakamaau totonú (‘Aisea 42: 1-3).

Tūsite:  Ke tau tukupā ke tau muimui kia  Sīsū; Fua hotau kolosí, pea tau vīkiviki ai, he neongo Ko e Tokāteline fakamā ka `oku ta`engata `a hono ivi mo fu`u hono mafi (1 Kolinito 1: 18-20).  

‘Epeleli:  “A’usia ‘o e Palōmesí:  Nofoma’u ki he ‘Otua ko hotau Hūfangá pea Fakamo’oni kia Kalaisi Toetu’u.” / “Living the Promise: Sheltering  in God’s Refuge as a Witness to the Resurrection Christ.”

Pulelulu:  Ke tau tukupā ke tau muimui ki a Sīsū; Vakai ki hono lavaki`i `o siviivi`i ‘aki ia hotau lotó mo `etau mo`uí na’a ‘oku ‘i ai  ha `ulungaanga fakapō `oku lilo pea puli (Sione 13: 21-26).  

Tu’apulelulu:  Ke tau tukupā ke muimui kia Sīsū; Tali `ene tu‘utu‘uni fo‘oú, “Ke tau fe‘ofa‘aki: hangē ā ko ‘ene ‘ofa‘i kitautolú,” pea tau kole ki he `Otua ‘o e `Ofá, ha ivi `oku fe`ungá, ke tau lava mo kitautolu ‘o fai pehē foki (Sione 13: 34-35).

Sāpate Toetu’u:  “Kuo Toetu`u `a e `Eikí, Kuo Toetu`u mo`oni ia.”  Ke tau hūfia ‘a e ngāue ‘o e ‘ahó ni mo e uiké, pea tau fakafeta`i `i he ikuna tā tu`o taha na`e fai ‘e Kalaisi `i Kālevalé, pea tau fakapapau`i `oku tau kaungā ikuna mo Sīsū na’e fokotu’u hake mei he Pekiá (Saame 118: 1-2, 14-18).

‘Ahongofua 1:  Ke tau fakafeta`i he`etau “A’usia ‘a e Palōmesi” `o e Hā’ele mai ‘a e Laumālie Mā’oni’oni ko hotau Hūfanga pea mo e ma’u’anga ivi ke fai ‘aki ‘etau fakamo’oni kia Kalaisi Toetu`ú (Ngaue 2: 1-4a).  

Sāpate 2 Hili ‘a e Toetu’u:  Ke tau hūfia ‘a e ngāue ‘o e ‘ahó ni mo e uiké, pea tau fakapapau`i ko e ngāue kotoa pe ‘oku tau fai ko ‘etau “Fakamo`oni” ia ki he ivi mo e fu`u mafai `o Sīsū Toetu`ú (1 Pita 1: 3-9).  

‘Ahongofua 2:  Ke tau hūfia ‘a e To’u Lolotolo ‘o e Siasí ke nau “Nofoma’u ki he ‘Otua ko (Honau) Hūfangá pea Fakamo’oni kia Kalaisi Toetu’u” ‘i he tapa kotoa pe ‘o e mo’ui ‘oku nau fai fatongia aí (Luke 24: 30-35).

Sāpate 3 Hili ‘a e Toetu’u:  Ke tau hūfia ‘a e ngāue ‘o e ‘ahó ni mo e uiké, pea tau kau fakataha pe mo e Tohi Mahina ‘a e Siasí (UMC) ‘i hono hūfia ‘o e `Uluaki Kakai `o e Fonuá ni, kau `Initia Kulá, pea mo e kakai kotoa pe `i māmani `oku nau fekuki mo e faingata`a `o hono teketeke`i faka-Pule`anga kinautolu mei honau fonua tupu`angá, ke nau kei “Nofoma`u (pe) ki he `Otua ko honau Hūfangá” (Saame 116: 12-19).  

‘Ahongofua 3:  Ke tau hūfia `a e kau ului fo’ou kotoa pē ki he Siasí ke nau “Nofoma’u ki he ‘Otua ko (Honau) Hūfangá”, ko Ia ‘a e Tauhi Sipi Leleí pea ‘okú ne fakaongo ‘o ‘ilo’i mo ongo’i ‘a e le’o ‘o ‘ene fanga sipí (Sione 10: 1-4).

Sāpate 4 Hili ‘a e Toetu’u:  Ke tau fakafeta’i ki he Tauhi Sipi Leleí `i he tauhi haohaoa `oku tau ta`imālie aí, pea tau tautapa ki he ivi `o e Toetu`ú ke ne fakatonua `a e tauhi `oku fai `e he kau Faifekaú, kau Tauhi `Ahó, kau Faiakó, mo kinautolu kotoa pe kuo faka-fatongia `aki `a e tauhi `o e fanga sipi `a e `Otuá (Saame 23).

‘Ahongofua 4:  Ke tau hūfia `a e teuaki `o e ngaahi Katoanga Faka-Mē `o e ta`u ko eni, pea tau hūfia `a `etau fānau tupú ke nau tukuloto`i `a e ngaahi akonaki te nau malanga `aki `i he ngaahi Lēsoni kuo nau teuteú mo e ngaahi akonaki kotoa pe kuo nau `inasi aí, pea nau hoko ko e kau Fakamo`oni `o Sīsū Toetu`u (Sione 14: 6-7).

Mē:  Fakaivia ‘e he Ngaahi Me’a’ofa Fungani ‘a e ‘Otuá:  Taki ‘e he Laumālié he lotolotonga e Tauha’a ‘a e faingata’á / “Empowered by God’s Gifts: Spirit-led Purpose and Control Amidst Chaos .”

Sāpate 5 ‘o e Toetu’u:  Ke tau hūfia ‘a e ngāue ‘o e ‘ahó ni mo e uiké, pea tau hapai ‘a e ngāue lahi ‘oku fai ‘e he Pulé mo e kau Failautohí kae’uma’ā ‘etau fānaú, ke fai ai pe honau “Fakaivia ‘e he Ngaahi Me’a’ofa Fungani ‘a e ‘Otuá: Taki ‘e he Laumālié he lotolotonga e Tauha’a ‘a e faingata’á” (Sione 14: 6).

‘Ahongofua 2:  Ke tau hūfia `a e kau finemui kotoa pē ‘a e Siasí ke “Fakaivia ‘e he Ngaahi Me’a’ofa Fungani ‘a e ‘Otuá: Taki ‘e he Laumālié he lotolotonga e Tauha’a ‘a e faingata’á” ke nau hoko ai ko hv a fa’ē lelei ‘i he kaha’ú (1 Pita 3: 13-15).

Sapate 6 ‘o e Toetu’u (Sāpate Fa’ē):  Ke tau hūfia ‘a e ngāue ‘o e ‘ahó ni mo e uiké, pea tau hapai si’i ngaahi fa’ē kotoa pe ‘a e Siasí ke “Fakaivia ‘e he Ngaahi Me’a’ofa Fungani ‘a e ‘Otuá: Taki ‘e he Laumālié he lotolotonga e Tauha’a ‘a e faingata’á” ke nau kei fai manavakavakava ‘i hono fakakakato honau ngaahi fatongia faka-fa’ē ‘i he lelei taha te nau ala lavá (Saame 66: 16-20).

‘Ahongofua 3:  Ke tau fakafeta’i kuo fai hotau “Fakaivia ‘e he Ngaahi Me’a’ofa Fungani ‘a e ‘Otuá: Taki ‘e he Laumālié he lotolotonga e Tauha’a ‘a e faingata’á” pea faingamālie ai ke hiva fakafeta’i mo fakamālō’ia ‘a e Tu’i fakalevelevá (Sāme 47: 5-9).

Sāpate Hā’ele Hake:  Ke tau hūfia ‘a e ngāue ‘o e ‘ahó ni mo e uiké, pea tau fakafeta’i he kuo “Fakaivia” kitautolu ‘e he “Ngaahi Me’a’ofa Fungani ‘a e ‘Otuá (mo) Taki ‘e he Laumālié lolotonga e Tauha’a ‘a e Faingata’á” ke tau lava ‘o ‘ilo ‘a e Fekau ‘o e Hā’ele Haké mo fakamo’oni ki ai ‘i he feitu’u kotoa pē ‘i he taimi kotoa pē (Luke 24: 50-53).

‘Ahongofua 4:  Ke tau fakafeta’i he kuo ““Fakaivia” kitautolu ‘e he “Ngaahi Me’a’ofa Fungani ‘a e ‘Otuá (mo) Taki ‘e he Laumālié lolotonga e Tauha’a ‘a e Faingata’á” ke tau inu mei he matavai mo`ui `oku mapunopuna ma`u pē (Sione 7: 37-39).

Sāpate Penitekosi:  Ke tau hūfia ‘a e ngāue ‘o e ‘ahó ni mo e uiké, pea tau fakafeta’i mo tuku kolōlia ki Langi he koloa Fungani kuo toloto monū’ia ai e Siasí pea tau kole ki he Ivi mo e Mafai ‘o e Laumālie Mā’oni’oni na’á ne kamata’i e Siasí ‘i he ‘Uluaki Penitekosí,  ke ne kei fai ai pe hono “Fakaivia” mo “Tataki” e ngāue `a e Siasí he ‘aho kotoa pē (Saame 104: 30-34).

‘Ahongofua 5:  Ke tau lotua ‘a e ngaahi tu’utu’uni ‘oku fai ‘e he kau Taki faka-Politikale ‘o māmaní, ke fakalanu lelei’i ‘e he “Melino mo e Fakamaau Totonu” (Peace and Justice) ‘a e ‘Otuá (Saame 8: 4-9).

Sāpate Tolu Taha’i ‘Otua:  Ke tau hūfia ‘a e ngāue ‘o e ‘ahó ni mo e uiké, pea ke tau kole ki he ‘Otua ko e Tamaí, ‘Otua ko e ‘Aló mo e ‘Otua ko Laumālie Mā’oni’oní ke ne fai hotau fakaivia ‘i hono fakakakato ‘o e “Fekau Lahí” (Matiu 28: 19-20).  

Siune:  Fe’ao Tu’uma’u mo e ‘Otuá:  Mātā hono Fakaofó, ‘Ilo ‘ene ‘Ofá ‘o fou ‘i he Talangofua / 
    “Living in God’s Presence: Following with Wonder, Love and Obedience.”

‘Ahongofua 1:  Ke tau feinga ‘i he tokoni mai ‘a e Laumālie Mā’oni’oni ke “Fe’ao Tu’uma’u mo e ‘Otuá:  Mātā hono Fakaofó, ‘Ilo ‘ene ‘Ofá ‘o fou ‘i he Talangofua” (Saame 33: 1-5).

Sāpate 2 Hili ‘a e Penitekosi:  Ke tau hūfia ‘a e ngāue ‘o e ‘ahó ni mo e uiké, pea tau hapai ki he ‘Otuá ‘a kinautolu kotoa pe si’otau ngaahi ‘ofa’anga ‘oku lolotonga mo’ua ‘i he ngaahi faingata’a fakaesinó ke ne fakamo’ui (Matiu 9: 20-22).

‘Ahongofua 2:  Ke tau tau feinga ‘i he tokoni mai ‘a e ‘Otua Māfimafi ke tau “Mātā hono Fakaofó, ‘Ilo ‘ene ‘Ofá” pea tau fai pehē mo kitautolu:  ‘Ofa mo talitali lelei si’i kau muli, tukuhāusia mo e ‘auhē ‘i he feitu’u ‘oku fai ai ‘etau tauhi Lotú (Senesi 18: 1-5).

Sāpate 3 Hili ‘a e Penitekosi:  Ke tau hūfia ‘a e ngāue ‘o e ‘ahó ni mo e uiké, pea tau fakahaa’i ‘a ‘etau “Fe’ao Tu’uma’u mo e ‘Otuá” ‘aki ‘etau ‘ofa mo fakamolemole’i kinautolu kotoa pe kuo nau fai mai ha kovi kiate kitautolu (Loma 5: 6-8).

‘Ahongofua 3:  Ke tau hūfia kinautolu kotoa pe ‘i hotau ngaahi Siasí ‘oku “Ui” ki he ngāue faka-Faifekaú ke nau ‘ilo ko e “’Ió” mo hono fakakakato ‘o e Uí ‘oku fai ‘aki ia ‘a e “Fe’ao Tu’uma’u mo e ‘Otuá:  Mātā hono Fakaofó, ‘Ilo ‘ene ‘Ofá ‘o fou ‘i he Talangofua” (Matiu 10: 37-39).  

Sāpate 4 Hili ‘a e Penitekosi (Sāpate Tamai):  Ke tau hūfia ‘a e ngāue ‘o e ‘ahó ni mo e uiké, pea tau hapai si’i ngaahi Tamai kotoa pe ke fai tāpuekina mo fakamonū’ia mai kinautolu ke nau kei hoko ai pe ko e Pununga Malu mo e Taulanga Uú ke malu mo hao ki ai e to’utangatá (Saame 86: 6-8).  

‘Ahongofua 4:  Ke tau hapai ‘i he lotu ‘a e kau Faifekaú kae’uma’ā e Siasi ‘oku kau he Fehikitaki ‘o e ta’ú ni ke faka-tokamālie mai ‘e he ‘Otua Māfimafí ‘a e Tokanga Ngoue na’e fai MEI ai ha hiki ‘o tatau pe mo ia ‘oku fai KI ai ha hiki (Matiu 10: 40-42).

Sapate 5 Hili ‘a e Penitekosi:  Ke tau hūfia ‘a e ngāue ‘o e ‘ahó ni mo e uiké, pea tau lotu ma’á e kau Faifekau kotoa pe kuo nau a’usia e faka’osinga honau ta’u ngāué pea mo kinautolu ‘oku hū fo’ou mai ki he Konifelenisí, ke kei “Fe’ao Tu’uma’u (pe) mo e ‘Otuá” he “ngāue kuo fakaikuná” ‘o tatau pe mo ia “kuo toki kamatá” (Senesi 22: 9-14).
 
KO E LAU FOLOFOLA FAKA’AHO