NGAAHI KAVEINGA LOTU – MA’ASI KI SIUNE 2025

Ma’asi: Ke tau molomolomuiva’e kia Sīsū `i he halafononga `o e Lēnití / Let us tread on the heels of Christ in this Lenten journey.

Sāpate ‘o e Hā Fakakehe: Ke tau hūfia ‘a e ngaahi ngāue ‘o e ‘ahó ní pea mo e uiké, pea tau hapai mo e kau Taki he fāmilí, Siasí, mo e fonuá, ke nau molomolomu`iva`e kia Sīsū `o nau ma`u ivi, tau`atāina, mo e `amanaki lelei ke fakahoko `aki `a honau ngaahi fatongia kuo ui kinautolu ki aí (2 Kolinito 3: 17-18).

‘Ahongofua 1: Ke tau kole ha maama mo ha laumālie loto tō mei he `Otuá “Ke tau molomolomuiva’e (‘aki) kia Sīsū `i he halafononga `o e Lēnití”, pea lava ke tau `ilo ai hotau fatongia totonu ke fakahoko ki he `Otuá `o fou `i he foaki `oku fai ki he Siasí (Teutalonome 26: 1-3).

Sāpate ‘uluaki ‘i he Lēniti: Ke tau hūfia ‘a e ngaahi ngāue ‘o e ‘ahó ní pea mo e uiké, pea tau kole ha ivi ke tau lava `o molomolomu`iva`e kia Sīsū `i he ngaahi fatongia kuó ne ui kitautolu ki aí pea tau ikuna`i ai `a e ngaahi `ahi`ahi `oku tau fetaulaki mo iá (Luke 4: 1-2).

‘Ahongofua 2: Ke tau kole ki he Laumālie Mā’oni’oní ke ne tokoni’i kitautolu ke tau lava ‘o molomolomuiva’e kia Sīsū pea nofo ‘i he malu ‘o’oná, fakalaulauloto ‘i hono Palasi mo siofia hono faka’ofo’ofa he ‘aho kotoa ‘o ‘etau mo’uí (Saame 27: 4-6).

Sāpate ua ‘i he Lēniti: Ke tau hūfia ‘a e ngaahi ngāue ‘o e ‘ahó ní pea mo e uiké, pea tau lotu ma’á e kau tauhi fānaú ke nau lava `o molomolomu`iva`e kia Sīsū, ke nau hoko ko e kau fa`ifa`itaki lelei ki he fānaú mo e to`utangata hokó (Filipai 3: 17-21).

‘Ahongofua 3: Ke tau tautapa ki he Laumālie Mā`oni`oní ke ne tāpuekina kitautolu ‘aki ‘a e loto toponó ke tau tali `aki ‘a e ngaahi tala`ofa `a hotau `Otuá ma`atautolú, pea tau fiemālie ai mo e loto fakafeta`i (`Aisea 55: 1-3).

Sāpate 3 ‘i he Lēnití: Ke tau hūfia ‘a e ngaahi ngāue ‘o e ‘ahó ní pea mo e uiké, pea tau lotua kinautolu `oku mo`ua `i he ngaahi mahaki`ia fakaesino `oku `ikai ma’u hano faito`ó, ke kei lava pe ‘a honau laumālié `o molomolomuiva`e kia Sīsū (Saame 63: 1-8 ).

‘Ahongofua 4: Ke tau lotua `a e mo`ui faka-ekonomika `a e fonuá, tautautefito ki hotau ngaahi komiunití, ke `i ai ha fakaakeake `i he ngaahi ma`uanga mo`uí, ke tau malava `o fakahoko lelei hotau ngaahi fatongia faka-pa`anga `i he mo`uí (Siosiua 5: 9-12).

Sāpate 4 ‘i he Lēnití: Ke tau hūfia ‘a e ngaahi ngāue ‘o e ‘ahó ni pea mo e uiké, pea tau vilitaki ke tau molomolomu`iva`e `ia Sīsū, neongo `a `etau tōnounoú (2 Kolinito 5: 17-18).

KO E LAU FOLOFOLA FAKA’AHO