NGAAHI KAVEINGA LOTU – SIULAI KI TISEMA 2025

SIULAI: “Ke tau Laka atu he Hala kuo tofa ‘e he ‘Otuá: Ko e mo’ui `oku manako ki he fai Meesí, Fakamaau Totonú, pea mo e `Alo`ofá. / Walking in God's Way: A Life of Mercy, Justice, and Generosity.”

‘Ahongofua 1: “Ke tau Laka atu he Hala kuo tofa ‘e he ‘Otuá” ‘o fakasino ‘aki ia ‘etau fai meesi, ‘ofa, fai fakalao (fakamaau totonu) mo foaki ‘ofa kiate kinautolu ‘oku lolotonga faingata’a’ia he ngaahi ha’aha’a ‘o e mo’uí ni (Saame 30: 1-5).

Sāpate 4 hili ‘a e Penitekosi: Ke tau hūfia ‘a e ngaahi ngāue ‘o e ‘ahó ní pea mo e uiké, pea tau lotu ma’á e kau Faifekaú ‘i he kamata’anga ‘o e ta’u faka-Konifelenisí ni ke nau “Laka atu he Hala kuo tofa ‘e he ‘Otuá: Ko e mo’ui `oku manako ki he fai Meesí, Fakamaau Totonú, pea mo e `Alo`ofá” (Luke 10: 3-6).

‘Ahongofua 2: Ke tau fakaafe’i ‘a e Laumālie Mā’oni’oní ke ne tokoni’i kitautolu ke tau lava ‘o fakalelei mo ‘ofa ki hotau fāmili, kāinga mo e kaungā pilikimi kuo fuoloa fau ‘etau fesitu’a’akí (Luke 10: 26-28).

Sāpate 5 hili ‘a e Penitekosi: Ke tau hūfia ‘a e ngaahi ngāue ‘o e ‘ahó ní pea mo e uiké; pea tau “Laka atu ‘i he Hala kuo tofa ‘e he ‘Otuá” pea tau lava ai ke kātekina e me’a kotoa pē ke tāu mo e kakai ‘oku nofo ‘i he Maamá (Kolose 1: 11-14 – Liliu ‘a e Taulua).

‘Ahongofua 3: “Ke tau Laka atu he Hala kuo tofa ‘e he ‘Otuá” ‘o tauhi tauhi ma’u ke ‘oua na’a toe ‘i ai ha me’a ke ne uesia hotau lotó ka tau tutui pe ke fai ‘a e me’a ‘oku mahu’inga taha ‘i he mo’uí ni (Luke 10: 38-42).

Sāpate 6 hili ‘a e Penitekosi: Ke tau hūfia ‘a e ngaahi ngāue ‘o e ‘ahó ní pea mo e uiké, pea tau “Laka atu ‘i he Hala kuo tofa ‘e he ‘Otuá” ‘o tau fakafeta’i, falala, mo nofo ma’u ‘i he’ene ‘ofá’’ pea fai pe ke ta’engata (Saame 52: 8-9).

‘Ahongofua 4: Ke tau hūfia ‘etau fānau ‘oku ‘i he ngaahi Ako’angá ke nau “Laka atu he Hala kuo tofa ‘e he ‘Otuá” pea tuku ke hoko a Kalaisi ko e Makatu’unga pau ki he’enau mo’uí (Kolose 2: 6-10).

Sāpate 7 hili ‘a e Penitekosi: Ke tau hūfia ‘a e ngaahi ngāue ‘o e ‘ahó ní pea mo e uiké, pea tau lotu ma’á ‘e fānau ‘i he ‘api nofo hopoaté ke nau “Laka atu ‘i he hala kuo tofa ‘e he ‘Otuá” pea nau lava ‘o afe mei he koví ‘o ma’u ha lelei mo’oni (Luke 11: 10-13).

‘Ahongofua 5: Ke tau hūfia ki he ‘Otua Māfimafi ha faingamalie “nofo fonua” ma’á e kau faingata’a’ia ‘oku lolotonga Kole Hūfanga ‘i he ngaahi fonua ‘o ‘Iulopé kae’uma’ā ‘a ‘Ameliká ni (Saame 107: 3-7).

‘AOKOSI: “`Oku tau kau kotoa pē ki he Tākanga Tapu `a e `Otuá pea ke tau fakahoko hono Tu`utu`uní, ke Kauhala tatau `a e Tuí mo e Ngāué / We are all a part of God’s Redeemed Community where we are Called to live into the mandate of Aligning our Faith and Actions.”

Sāpate 8 hili e Penitekosi: Ke tau hūfia ‘a e ngaahi ngāue ‘o e ‘ahó ní pea mo e uiké, pea tau fakafeta’i he’etau kau ki he “Tākanga Tapu ‘a e ‘Otuá pea ke fakahoko mo hono Tu’utu’uní, ke Kauhala tatau ai ‘a e Tui mo e Ngāue” (Luke 12: 18-21).

‘Ahongofua 1: Ke tau lotu ma’anautolu kotoa pe ‘oku faingata’a’ia fakaesinó ke nau tu’uma’u ta’engaūe ‘i he Tui ‘oku nau kau ki he “Tākanga Tapu ‘a e ‘Otuá” pea ke nau “fakahoko ‘a hono Tu’utu’uní ke Kauhala tatau ai ‘a e Tuí mo e Ngāue” (Hepelu 11: 1-3).

Sāpate 9 hili ‘a e Penitekosi: Ke tau hūfia ‘a e ngaahi ngāue ‘o e ‘ahó ní pea mo e uiké, pea tau fakamo’oni ki he’etau kau ki he “Tākanga Tapu ‘a e ‘Otuá” ‘aki ‘etau tokoni ki he kau masivá, li’ekina mo tukuhāusiá (Luke 12: 32-34).

‘Ahongofua 2: Ke ta’eteteki ‘a ‘etau tauhi e ‘Otua ‘okú ne fakakau kitautolu ki he’ene “Tākanga Tapú” ‘i he mahino ‘oku ’i ai hotau tokoni ko e fu’u “’ao ‘o e kau fakamo’oni” pea tau “kitaki atu ‘etau lele ‘i he fakapuepue” ‘o fakamama’u kia Kalaisi ko hotau Takimu’á (Hepelu 12: 1-2).

Sāpate 10 hili ‘a e Pentekosi: Ke tau hūfia ‘a e ngaahi ngāue ‘o e ‘ahó ní pea mo e uiké, pea tau hapai kinautolu kotoa pe ‘oku faingata’a’ia fakaeloto ‘i he’etau nofó ke ngāue mai ‘a e Ivi liliu mo’ui ‘o e ‘Otuá ‘o fai honau fakamānava haké (Saame 80: 19).

‘Ahongofua 3: Tuku ke fotufotuaki ‘i he’etau leá mo e ngāué (tō’onga mo’ui) ‘a e tāpuaki ‘oku tau toloto monū’ia ai ‘i he’etau kau ki he “Takanga Tapu” ‘a e ‘Otuá, pea tau tukupā ke tu’u ai ‘etau ‘amanakí ki he kaha’u ‘o e mo’ui (Saame 71: 4-6).

Sāpate 11 hili ‘a e Penitekosi: Ke tau hūfia ‘a e ngaahi ngāue ‘o e ‘ahó ní pea mo e uiké, pea ke tau fakamo’oni ki he’etau kau ki he “Tākanga Tapu ‘a e ‘Otuá” ‘aki ‘etau vahevahe ‘a e koloa fungani kuó ne fakakoloa ‘aki kitautolú (Selemaia 1: 9-10).

‘Ahongofua 4: Ke tau hūfia ‘a e ngaahi fāmili ‘o e Siasí ke fiemālie pē ‘i he ‘ilo’i kuo ‘osi fakahaofi kitautolu mo fakakau ki he “Tākanga Tapu ‘a e ‘Otuá” pea ke tau nonga pe mo fiemālie ‘i he taimi ‘oku hoha’atu’u ai ‘a e ‘ātakaí (Hepelu 13: 5-7).

Sāpate 12 hili ‘a e Penitekosi: Ke tau hūfia ‘a e ngaahi ngāue ‘o e ‘ahó ní pea mo e uiké, pea tau kau mo e tala Kātoanga ‘a e “Tākanga Tapu ‘a e ‘Otuá”, ‘o fai ki he kakai ‘oku ‘ikai lau ko e kakaí he ko e Kātoanga ia ‘oku ‘i ai hono tala’ofá (Luke 14: 12-14).

SEPITEMA: “Okú ui kitautou `e he `Otuá ke ‘Ma`uma’u atu ki he lolotó,’ Luva hotau kotoá pea ke tau Taha mo e ‘Otuá mo e kaungā fonongá / God calls us into deeper understanding, total surrender, and unity with God and with one another.”

‘Ahongofua 1: Ke tau fakafeta`i `i he `etau a`usia `a e mahina fo`oú, pea tau lotua `a e ngaahi fa`ē `i he lotofale `o e Siasí ke nau malava `o “ma’uma’u atu ki he lolotó” `i he teuteu ke fakahoko `a e Tali Ui mo`ui ki he `Otuá (Saame 139:13-18).

Sāpate 13 hili ‘a e Penitekosi: Ke tau hūfia ‘a e ngaahi ngāue ‘o e ‘ahó ní pea mo e uiké, pea tau “luva hotau kotoa” kae malava ke ne toe fakafo`ou `etau mo`ui (Selemaia 18: 1-6).

‘Ahongofua 2: Ke tau hūfia `a kinautolu kotoa pe `a e kau ma`u lakanga `i he Siasí ke nau “Ma`uma`u atu ki he lolotó” `i hono fākafua honau lakangá (1 Timote 1: 12-14).

Sāpate 14 hili ‘a e Penitekosi: Ke tau hūfia ‘a e ngaahi ngāue ‘o e ‘ahó ní pea mo e uiké pea tau vilitaki ke tau hoko `o “Taha pea mo e `Otuá, pea mo hotau kaungā fonongá” (Saame 14).

‘Ahongofua 3: Ke tau hūfia `anautolu `oku nau nofo `i lelenga koe`uhi ko e ngaahi tu`utu`uni faka Palesiteni (Executive Orders) fekau aki mo e nofo faka-lao `i he fonuá ni (‘Amelika), ke fakaai mai ‘a e ngaahi feinga fakalao ‘oku fai ma’anautolú pea mo tokoni’i ke nau malava `o matu`uaki `a e faingata`a `oku nau fehangahangai mo iá (Saame 79: 8-9).

Sápate 15 hili ‘a e Penitekosi: Ke tau hūfia ‘a e ngaahi ngāue ‘o e ‘ahó ní pea mo e uiké pea tau hapai `a e kau Taki faka-Politikale `o e fonuá ni, mo māmani ke fakatupulekina `enau mo`ui ke faka-`Otua `enau fakahoko fatongia (1 Timote 2: 1-7)

‘Ahongofua 4: Ke tau kole ki he Laumālie Mā`oni`oní ke ne tokonia kitautolu ke tau vivili ke tau “Taha mo e `Otua pea mo hotau kaungā fonongá” pea ke fakasino ia `i he `etau mo`ui faka-`ahó (Saame 91: 14-16)

Sāpate 16 hili ‘a e Penitekosi: Ke tau hūfia ‘a e ngaahi ngāue ‘o e ‘ahó ní pea mo e uiké, pea tau kole ki he Laumālie Mā`oni`oní ke tokonia kitautolu ke tau malava `o ma`u `a e loto toponó `i he fononga pilikimi `oku tau faí (1 Timote 6: 6-11).

‘OKATOPA: “Ke tau fakamo`oni `oku ‘afio `a e ‘Otuá ‘i hotau lotó: Ko e Fononga ‘o e Tupulekina mo e Hounga’ia. / Embracing God’s Presence Within: A Journey of Growth and Gratitude.”

‘Ahongofua 1: Ke tau fakafeta`i `i he`etau a`usia `a e mahina fo`oú, pea tau hūfia `a e ngaahi fonua `oku hoko ai `a e ngaahi lingi toto `o e taú ke vave mai ha taimi kuo fakangata ai kae toloto monū’ia e fonua ‘i ha melino mo`oni (Tangilaulau 1: 1-6),

Sapate 17 hili e Penitekosi: Ke tau hūfia ‘a e ngaahi ngāue ‘o e ‘ahó ní pea mo e uiké, pea tau hapai kinautolu kotoa pe `oku nofo hopoaté (pilisone) pea mo kinautolu `oku nau hopoate pē `i he `enau fakakaukaú mo e tūkunga `o ‘oku ‘i ai `enau mo`uí (Saame 137).

‘Ahongofua 2: Ke tau “Fakamo`oni ki he `afio `a e `Otuá `i hotau lotó,” `aki ‘etau fakahoko mo fakakakato `ene ngaahi fekau ke fai ai hotau fakautpulekina ‘i he mo’ui lō-tolú (Selemaia 29: 4-7)

Sāpate 18 hili ‘a e Penitekosi: Ke tau hūfia ‘a e ngaahi ngāue ‘o e ‘ahó ní pea mo e uiké, pea tau “Fakamo`oni ki he `afio `a e `Otuá `i hotau lotó” `aki ‘a hono fakahaa’i `etau hounga`ia `i he `etau lea mo `etau tō`onga mo`ui (Saame 66: 1-7).

‘Ahongofua 3: Ke tau “Fakamo`oni ki he `afio `a e `Otuá `i hotau lotó” ‘aki ‘etau tali ‘a e Folofola ‘a e ‘Otua ke ne fai hotau faka-tupulekiná ‘i he tapa kotoa pe ‘o e mo’uí (2 Timote 3: 16-17).

Sapate 19 hili ‘a e Penitekosi: Ke tau hūfia ‘a e ngaahi ngāue ‘o e ‘ahó ní pea mo e uiké, pea tau “Fakamo`oni ‘oku `afio `a e `Otuá `i hotau lotó” pea `oku ne fakaili `a `etau Tuí ke fe`unga mo e halafononga `o e mo`uí ni (Luke 17: 5-6).

‘Ahongofua 4: Ke tau “Fakamo`oni `oku `afio `a e `Otuá `i hotau lotó,” pea kuó ne fai hotau fakatupulekiná `o liliu `a e faingata`á ki he faingamalie pea `oku fe`unga `ānoa pe `a `ene Kelesí ma’a ‘etau ngaahi me`á kotoa (Sioeli 2: 23-27).

Sapate 20 hili ‘a e Penitekosi: Ke tau hūfia ‘a e ngaahi ngāue ‘o e ‘ahó ní pea mo e uiké, pea tau “Fakamo`oni ‘oku `afio `a e `Otuá `i hotau lotó” `o tau fakahounga`i `a `ene `alo`ofá mo `ene fakamo`uí `aki `etau `ofa ki he masivá mo e li`ekiná (Saame 65:1-5).

‘Ahongofua 5: Ke tau “Fakamo`oni `oku `afio `a e `Otua `i hotau lotó,” pea `okú ne ue’i ke tau ongona ‘a e tangi (‘ioho) mo e to’e ‘a hono kakaí (Hapakuki 1: 1-4).

NOVEMA: “Ko e Tuí ‘oku makatu`unga `i he ‘Otua `okú ne Liliu, Fakaivia mo Fakafo’ou e Fakatupú / Faith is Grounded on God who Transforms, Empowers, and Renews Creation.”

Sāpate 21 hili ‘a e Penitekosi– Sāpate ‘o e kau Sangató: Ke tau hūfia ‘a e ngaahi ngāue ‘o e ‘ahó ní pea mo e uiké, pea tau fakahā ko e “Tuí ‘oku makatu’unga ‘i he ‘Otua ‘okú ne Liliu, Fakaivia mo e Fakafo’ou e Fakatupu” (Saame 119: 137-144).

‘Ahongofua 1: Ke tau lotua ‘a ‘etau tui, ke tau tu’ukalikali hono taukave’i ‘a e Huafa ‘o Sisu Kalaisi mo ‘ene ngaue fakamo’ui he lotolotonga e kuonga kuo hulu fau e longoa’a mo e fakakikihi (2 Tesolonaika 2:13-17)..

Sāpate 22 hili ‘a e Penitekosi: Ke tau hūfia ‘a e ngaahi ngāue ‘o e ‘ahó ní pea mo e uiké, pea tau fakalaulauloto he lahi ‘o e ‘Otua ‘o tekaki ki ai ‘etau ngaahi kavenga mafasia ke ne fai ‘e ia hotau fakaaivia mo fakafo’ou. (Saame 145:1-5).

‘Ahongofua 2: Ke tau tukupā mo fakapapau’i ta’etoeveiveiua ‘oku ‘ikai pea mo ha toe taha ‘e tu’u ai ‘etau Tuí ka ko Sihova pē, ‘a e “’Otua ‘okú ne liliu, Fakaivia mo Fakafo’ou e Fakatupú” (Luke 21: 16-19).

Sapate 23 hili ‘a e Penitekosi: Ke tau hūfia ‘a e ngaahi ngāue ‘o e ‘ahó ní pea mo e uiké, pea tau hākahaka mo tome’e he fakatupu fo’ou kuo fai ‘e Sihova ‘i hotau ngaahi lotofalé, Siasí mo e kaungā pilikimí (‘Aisea 65: 17-19).

‘Ahongofua 3: Ke tau lotu mo fakafeta’ia hono tokangaekina kitautolu ‘e Sihova neongo hono li’ekina kitautolu ‘e he kakai ne tuku falala kitautolu ki aí. Ko e tui kia Sihova ‘oku toka ki ai ‘etau ‘amanaki (Selemaia 23: 1-4).

Sāpate ‘o e Tu’i ‘a Kalaisi: Ke tau hūfia ‘a e ngaahi ngāue ‘o e ‘ahó ní, pea mo e uiké; pea tau fakafeta’i he afeitaulalo ‘a e ‘Otua Māfimafi ka ne hifo mai ‘o hakeaki’i ‘a e kau angahala ko kitautolu neongo ‘etau tō mo humu he halafonongá. Ko e fakamahino ko Sīsū Kalaisi ‘oku Tu’i ‘i langi mo māmani (Luke 1: 68-69)

‘Ahongofua 4: Ke tau lotu mo fakafeta’ia hotau monū’ia he kuo hoko ‘o mo’oni ‘i hotau kuongá ni ‘a e ngaahi palōfisai ‘a e kau Palōfita ‘o e ngaahi kuonga mu’á (‘Aisea 2: 1-5).

Sāpate ‘Uluaki ‘o e ‘Etiveni: Ke tau hūfia ‘a e ngaahi ngāue ‘o e ‘ahó ní pea mo e uiké, pea tau fakafeta’i he’etau tu’uta he ‘uluaki Sāpate ‘o e ‘Etivení, ka ko e taimi ‘o e teuteu he ‘oku ‘ikai ke tau ‘ilo ki he taimi mo e houa ‘e hoko mai ai ‘a e Fanautama ‘a Tangatá .(Matiu 24: 36-44).

TISEMA: “Ke tau Tatali fie tatali ‘o Hākahaka he kuo Hopo Hake `a e La`ā Mo`oni `o e Faka`amanakí, pea tau kaungā ngāue mo e Laumālie Mā`oni`oní ke fakatupulekina `a hono Pule`angá `i māmani. / Waiting in Anticipation, Experiencing the Joy of Liberation while Actively participating with the Holy Spirit to bring about God’s Kindom here on Earth.”

‘Ahongofua 1: “Ke tau tatali fie tatali ‘o Hākahaka he kuo Hopo hake ‘a e La’ā Mo’oni ‘o e Faka’amanakí, pea tau kaungā ngāue mo e Laumālie Mā’oni’oní ke fakatupulekina hono Pule’angá ‘i māmani” (‘Aisea 11:1-5)

Sāpate Ua ‘o e ‘Etivení: Ke tau hūfia ‘a e ngaahi ngāue ‘o e ‘ahó ní pea mo e uiké, pea tau kau fakataha pe mo e me’a mo’ui kotoa ‘o e Fakatupú ‘i hono fai ha ngāue ‘oku ‘aongá ke ne fakatupulekinga ‘a hono Pule’angá ‘i māmani (Loma 15:7-9).

‘Ahongofua 2: Ke tau lotua kitautolu ke tau lotolahi mo tatali fie tatali neongo hono fepalekina kitautolu ‘e he ta’au faingata’a ‘o e halafonongá. Ko hono talá, “Ko hono ‘ā’ālonga pe, ‘e toki hā kotoa ‘amui” (Semisi 5: 7-10).

Sāpate 3 ‘o e ‘Etiveni: Ke tau hūfia ‘a e ngaahi ngāue ‘o e ‘ahó ní pea mo e uiké, pea tau kau fakataha mo e me’a mo’ui kotoa pe ‘o e Fakatupú ‘i hono fakahikihiki’i hotau ‘Otuá mo ‘ene ngaahi ngāue fakaofó (‘Aisea 35: 1-5).

‘Ahongofua 3: Ke tau hūfia ke tokoni mai ‘a e Laumālié ‘o ngaohi hotau lotó ke tau to’a mo lahi kae lava ‘o tu’uma’u he nofo mo e ‘amanaki ki he hoko mai ‘a e ivi fakamo’ui ‘o e ‘Otuá ‘o tau toloto monū’ia ai (Saame 80: 17-19).

Sāpate 4 ‘o e ‘Etiveni: Ke tau hūfia ‘a e ngaahi ngāue ‘o e ‘ahó ní pea mo e uiké, pea tau fakafeta’i kuo “Hopo hake ‘a e La’ā mo’oni ‘o e Faka’amanakí” ‘o fou mai he ‘ofa ‘a e ‘Otuá kia Mele mo Siosefá (Matiu 1:18-25).

‘Ahongofua 4: Ke tau mavava fiefia mo hiki hotau le’ó he ‘Ai Kakano ‘a e ‘Otuá ‘o hoko mai ki he ‘Ai’angakai ‘o e manú ko hotau Fakamo’ui. Ko e hono leá, “Fakafeta’i e ma’u koloa, Fakafeta’i he ma’u Kilisimasi, Fakfeta’i he ma’u Kalaisi” (‘Aisea 52: 7-10).

Sāpate Hili ‘a e Kilisimasi: Ke tau hūfia ‘a e ngaahi ngāue ‘o e ‘ahó ni mo e uiké, pea tau fakamahu’inga’i ‘a e hoko mai ‘a e ‘Otuá ki māmani ‘i he kuonga ‘oku kāupo’uli, kae fakafeta’i ne ‘ikai lava ‘e he faingata’a ‘o e halafonongá ke ne lōmia ‘a Kalaisi mo ‘ene ‘ofá (Sione 1: 4 & 5).

‘Ahongofua 5: Ke tau fakafeta’i he tauhi hao ‘a e ‘Otuá kuo fai ma’á e kau vaivaí pea tau kau ai hono fakaikuna ‘a e ta’u kuo tau lākaí kae’uma’ā e ‘amanaki lelei ki he ta’u fo’ou kuo tau kamatá ni, ke tau fakatupulekina ai hono Pule’angá (‘Aisea 60:1-6).

KO E LAU FOLOFOLA FAKA’AHO